分享
阿媽生日🎂challenge！
2008年11月08日
栗頭老師:
今日係阿媽嘅生日。我諗住今次特別啲，想帶你哋去山頂行吓，等你可以呼吸一下新鮮嘅空氣，同埋唔好成日屈响張床度。當然我明白到，帶你出去嘅過程，將會係非常challenging！
首先，我當然致電易達巴，睇吓佢哋會唔會有一絲嘅機會，可以有車接你。機會，當然係非常渺茫，因為佢哋通常都要兩至三個禮拜前book，而我哋好遲決定，根本無可能book到！
book van仔嘅話，佢哋無升降台，同埋根本就唔夠位比輪椅放。所以，out！的士嘅話，同之前嘅問題一樣，我哋根本唔夠力抱你上落，又驚整親你。所以，out。我再諗，唯有坐地鐵再轉巴士。
決定咗交通工具之後，我又要check吓究竟個地鐵站邊個出口可以比輪椅上落，又或者有無lift。諗完地鐵個流程之後，又再check點樣由地鐵過巴士站，再check嗰架巴士有無升降台，再check個餐廳有無位比輪椅過。(睇見我安排成個流程嘅難度，就足以証明我真係好想好想你同我哋一齊去！) check哂之後，掌握咗一啲資料，應該無問題啦啩，做哂research㗎嘛！
到咗今日，我哋就要試吓究竟成個流程work唔work。
首先，我哋由你按摩嗰間鋪頭出發。我哋要先過馬路 (呢段ok，easy job！)
之後，去到地鐵站，原來要call啲職員上嚟，等咗5至10分鐘度，個職員就推住架好奇怪嘅機器，佢身水身汗咁將你張輪椅扣响個機器度。(攪到我都唔係幾好意思….其實，點解地鐵，呢啲咁大型嘅機構，啲設施唔係應該好啲㗎咩？)
之後，你部輪椅扣實嗰部機器，你坐响輪椅度，嗰位員工就响背後推你。週圍啲人都投射一啲奇怪嘅眼光，望住你坐咗响一架咁奇怪嘅機器度。可能，你自己都覺得尷尬，又或者，一路落樓梯嘅時候，你好驚啦，所以，你一路合埋雙眼。終於，我哋到咗入閘，再坐升降機落月台，再坐地鐵過海。栗頭，你有幾耐無踏過地鐵呀？出街開唔開心呀？(可能，你都覺得煩，要攀山涉嶺咁先可以去一個地方。)
到咗中環站之後，我哋要過交易廣場嗰個巴士站踏巴士上山頂。我哋首先要坐lift上行人天橋過干諾道中，之後原來係要到交易廣場嘅其中一座先有lift再落巴士站，仲要係交易廣場啲人特登開架lift比你。
勞煩咗好幾個人之後，我哋終於到咗巴士站。架巴士一嚟到，個司機見到，當然就唔係咁友善，因為呢架巴士嘅設計，係要响後門上落輪椅，咁即係上落車都要麻煩到佢多啲。仲有，呢啲巴士擺輪椅個位真係奇細，巴士公司其實點諗㗎呢？
經過重重障礙之後，我哋終於到山頂啦！
栗頭，你快啲呼吸得大力啲！我哋終於可以呼吸到呢度嘅新鮮空氣，一，二，三，我哋一齊吸！
我哋陪你行咗個圈，食阿媽嘅生日lunch，再食吓雪糕。今日，係我哋好難得可以一齊為阿媽慶祝生日，我一定會好好咁記住！
(後記：當年嘅地鐵入口已經加咗lift。仲有坊間已經有比輪椅直接上落嘅的士，仲有Google Map嘅幫助。時代有所不同，而家無障礙設施已經比起當年有所改善，真係替有需要人士開心。)
