分享
要Alternative，就要Overcome! 💪
2008年10月20日
栗頭老師:
之前你再試過因為肺炎入院，令到你嘅身體好似又再弱咗。雖然醫生講過會盡量幫你，但係一路以嚟，似乎作用不大。係咪西藥對你無乜作用？我地一家，由始到終，都只係會睇西醫，針灸呀、中藥呀、推拿呢啲對於我地嚟講，真係非常陌生。不過，而家似乎我地都會試吓，等你可以雙管齊下，希望你可以有好轉啦！
我地之前都有問過，有無人肯上門幫你做按摩，等你唔駛咁辛苦，要出出入入。試過某幾個嚟完之後，都唔肯再嚟，可能個環境始終麻麻，又無冷氣。又或者，上得門嘅，就要天文數字。點算呢？我唔想你就咁停咗响度喎！
於是，我再諗吓，我地自己近嚟有做開一間都幾好。不過，就要過海，舟車勞頓，驚你受唔住成個過程。同埋帶你過去都有啲難度，因為扶你上落的士，我地唔夠力會整親你。仲要，兩個地方都無直接巴士或者地鐵，咁點算呢？
正感到非常徬徨之際，我嘅朋友介紹咗易達巴服務比我。佢可以點對點咁接載位老人家，佢地架車有特別升降台，可以比啲輪椅直接上落，咁你咪唔駛比我地抱嚟抱去咁辛苦囉，而且收費合理。
到你按完摩之後，又可以原車返番老人院。成個流程，都盡量令你無咁辛苦，而你又終於可以接受一下其他方面嘅治療。
我好希望你可以一個星期去按摩兩至三次。不過，有時易達巴嘅時間未必可以完全配合，尤其是初初，好多時啲時間都比人book咗(通常都要兩，三個禮拜前預約)。唔等咁耐啦，為咗唔想延誤你治療嘅時間，book 咗之後啲時間先，未得嘅我就唯有揀踏有升降台嘅巴士帶你去開始先，但係就要行幾遠。
體力嘅消耗當然無所謂，但係去到上巴士嗰一刻，問題就出現咗。通常，啲巴士司機見到有輪椅上落，佢地要特登出嚟放低個升降板，就好似唔係咁願意。(當然，唔會係全部，總有一，兩個係好nice嘅)
上到車，再見到用嚟安放輪椅嘅位置，已經擺咗啲貨或者企咗幾個人(我已經盡量揀非繁忙時間出動，但係唔知點解，香港無論任何時段，都係充滿人？？？)佢地一見到張輪椅，唯有即刻拎開啲嘢又或者閃開。而佢地嘅面口當然就麻麻啦！(我覺得好奇怪，人人都有機會變老，需要人照顧，點解佢地會咁嫌棄呢？做人嘅嘢，都係將心比己好喎！)
經過艱辛嘅旅程之後，我地終於安全到埗，我成個人好似散哂咁。算啦，只要我諗到你有機會好番，我就已經覺得好開心，再攰都係値得嘅！
如有需要，可到易達巴士網頁了解多啲。
