耆妙
分享
分享
網主分享
老人👴🏻成細蚊👶🏻？
|
2022年08月09日
|
A+
2007年12月25日
栗頭老師:
今日係普天同慶嘅聖誕節，你開唔開心呀？响你未有事之前，我從來都唔會關心呢個問題。BTW，其實你有無開心過？😔
好啦，我唯有安慰自己，遲做好過無做。為咗令你都感受到節日嘅氣氛，我特登走去買啲聖誕嘅裝飾同埋帽，等你可以開心一下！我買完之後，就嚟幫你佈置，希望你會感受到我想帶比你嘅快樂！
之前，我希望你會開心，就盡量將你推到附近你最鐘意嗰間快餐店，同你食你最愛嘅肉醬飯同埋凍奶茶。我一有時間，就希望可以做到。期間，我發現到要用輪椅帶你去附近嗰間快餐店一啲都唔容易。我地要兜一大個圈，同埋上落商場入口要托起架輪椅，完全無合適輪椅過嘅通道。
另外，為咗希望你可以行番，就去嘗試揾有無按摩師肯上門幫你做推拿，同埋針灸，可以諗到嘅方法，我地都會盡量試！因為，我地唔想見住你差落去！
但係，每次當啲師父嚟幫你做治療嘅時候，你都好似唔係咁願意咁。係咪佢地太大力？又還是你怕陌生人掂你？不過，咁樣可能會對你有幫助喎，麻煩你忍忍啦，好嘛？又或者當我地陪你行嘅時候，你可唔可以積極啲，盡量配合吓呢？
其實，每次諗咗十萬個方法想幫你嘅時候，我都會以為咁樣你會開心，但係，究竟係咪呢？你又無話比我地聽你唔鐘意，咁我地就唯有從自己嘅角度出發，希望你會明白！
越嚟越發覺到，以前成日聽咩「老人成細蚊」原來係真嘅。
長者無論响照顧同溝通上，同細路仔都幾似，只係個size唔同。兩者都係需要無比嘅愛心同耐性，栗頭，我已經盡量有愛心同耐性㗎啦！(你知啦，我畢嬲EQ都麻麻㗎啦！🤣)
