耆妙
分享
分享
網主分享
哭泣的栗頭……🥺🌰
|
2022年07月12日
|
A+
2007年07月12日
栗頭老師:
你今次都跌得幾傷，所以要响醫院住耐啲。我就盡量捱過每次嘅漫長車程嚟見你。每次嚟探你，都會問吓你有無事，同埋同外傭一齊幫你抹吓身、抹吓面，希望你感受到我地對你嘅關心。每次可以逗留嘅時間雖然唔算好耐，但係我已經盡量嚟多啲，你感唔感受到我嘅苦心？
今日，我照常嚟探你，幫你抹吓身、抹吓面之後，見時間差不多，就諗住同你講拜拜。我行到差唔多到巴士站嘅時候，突然間個電話响起，原來係個外傭call我，我嚇一嚇，唔知唔知係咪你發生乜事？啱啱仲好地地㗎？
當我接咗個電話之後，聽到外傭把聲好似好焦急咁，點呀？乜事？快啲講啦！佢話你响度喊緊。吓！唔會啩？我响有記憶以嚟，都唔覺得你係會喊㗎喎，係唔係個外傭攪錯咗呀？佢見我唔係好信，就將個電話遞比你。
我聽到你响度抽泣….我從來都無聽過你喊，我個心當堂一酸，栗頭，你做乜喊呀？
你話: 無，我覺得自己好悽涼！
我個心再酸多一啲！你唔好咁諗啦！我隨即跑番入嚟安慰你。
原來，你喊嘅嘅時候，唔會好似我地咁，啲眼淚係咁標出嚟。而係，塊面揦埋一齊，間中有一兩滴眼淚。
見到你咁，好自然我又喊埋一份。栗頭，你唔好喊啦！
我相信最難捱嘅日子始終都會過去嘅，只要我地唔好咁輕易放棄！我地快啲抹乾啲眼淚，嚟緊，仲有好多事情需要我地去面對……
