耆妙
分享
分享
網主分享
驚嚇來電！！📞
|
2022年07月05日
|
A+
2007年07月10日
栗頭老師:
原來，安穩嘅日子真係會過得特別快。
Photo by Alexander Andrews on Unsplash
今日，阿媽突然打比我，把聲好似好焦急咁，佢話你又再跌親，今次仲要幾嚴重！
唔係啩！又嚟？乜唔係已經有外傭响度㗎啦咩？佢無睇住你㗎咩？
我隨即趕到醫院。
原來，你咁啱响外傭去咗洗手間，同埋阿媽落咗樓下社區中心嘅時候，自己行咗出嚟諗住去洗手間。
點知，你唔小心失去平衡，向後跌，成個頭撼落個牆角度，流咗好多血！
吓！點算呀？會唔會有生命危險㗎？
好彩！到醫生出嚟同我地解釋情況嘅時候，話你無乜大礙。不過，咁樣跌一跌，你又已經好傷㗎啦。
你今次出院之後，我究竟仲可以諗到有啲乜嘢可以幫你？我無可能唔比個外傭去洗手間！佢更加無可能24小時standby！人地都係人，要休息㗎嘛！咁點算好呀？之前已經講過，阿媽係唔可以分担到咁大嘅責任。咁點算？？？
其他屋企人有建議不如比你入老人院，等你可以有人睇實。
但係，我真係好唔想！未到最後，我都唔想放棄。我以前，實在聽到太多關於老人家入咗老人院之後會被人冷待嘅事，之後仲會變得越嚟越差。我真係唔想你好似佢地咁樣……咁點算呀？
我諗起之前外公有張好似醫院嗰啲電動床，嗰種床會唔會令你無咁易自己亂咁落床呢？如果真係嘅話，咁你咪無咁危險囉？
唔理啦！等你出嚟之後，試一試再算，可能work呢？你咪可以留响屋企囉？
呢一刻，我仲好天真以為問題又再次得到解決。原來，另一個計時炸彈又已經埋伏……. ？
