仍未老 快樂能自製 😌

呢幾日，我諗大家都有聽過嘅新聞就係東鐵綫過海段通車。見到有好多鐵路迷，都會急不及待去搶搭列車，見證歷史新一頁。

港鐵為咗宣傳東鐵綫過海段，拍咗一段短片 ，當中最令人深刻嘅係李司棋唱嗰幾句 ，佢負責介紹旺角東站。

花墟鮮花 睇見都著迷

做鏡仔fans 又有咩問題 ？

IG出post 興奮出哂嚟

仍未老 快樂能自製

睇到李司棋過去嗰幾年形象非常正面，同時代接軌，絕對可以作為第二人生嘅一個role model。

佢唔係淨係停留咗響「肥媽喺大廳」或者「我對眼就係證據」嘅年代。

近年見有報導都會講佢去打卡、Instagram出post，令我都覺得佢真係一個「仍未老 快樂能自製」嘅人。

如果我哋都可以好似佢咁，保持心境年輕，不斷試新嘢，建立一個咁正面快樂嘅第二人生，年老嘅過程已經變得不可怕。