耆妙
分享
分享
網主分享
Back to 兒時！👶🏻
|
2022年08月02日
|
A+
2007年10月15日
栗頭老師:
自從你入住咗我地幫你揀嗰間護老院之後，阿媽嘅情緒好似暫時平靜咗啲，而你又好似再無乜大事發生，一切變得安穩落嚟。
响你無响屋企住嘅時候，我盡量會嚟探你，等你覺得我地依然係好關心你。
雖然，你有時都會問我地，你可以幾時返屋企，但係，我地真係afford唔起，如果你返咗屋企之後，你會唔會再整親？又或者阿媽會唔會再情緒失控？我地真係唔夠胆搏。我地呢一刻嘅平靜同埋平衡，並唔係咁輕易得到。所以，明知道你當然唔想同啲陌生人共處一個地方，但係，都只可以暫時保持住呢個狀況，再睇定啲先！
每次嚟探你嘅時候，我都嘗試同你行一行，希望你可以練番自己行路。為咗你無咁悶，我嘗試買啲唔同嘅嘢比你解悶，好似收音機、填顏色簿，等你唔好同社會脫節，同可以用吓自己個腦同埋手。
另外，我地又同你玩潛烏龜，等你練吓個腦用嚟配對。我地再同你玩你最鐘意嘅麻雀，等你可以再思考多啲！(諗起你未有事之前，你成日都想同我地幾個打，因為我地已經夠4個，同埋你打得實在太慢，所以我地唔噚你玩！我地真係唔啱…)
久而久之，嚟探你嘅時間，就變咗我地一家人一個禮拜裏面唯一相聚嘅時刻。一個禮拜一次，實在有啲少。所以當初點解我地揀呢間護老院，就係因為希望你盡量近我地一啲，等我可以容易啲响其他時間都可以嚟揾吓你。有時，甚至乎大家連一星期一次嘅見面時間都夾唔到嘅話，我咪自己嚟揾你，帶你去隔離間酒樓飲茶，等我地兩個撑枱腳，等你唔駛咁悶。
每次去到酒樓嘅時候，我將你嘅輪椅泊好之後，就走去攞條枱布褸住你，等你無咁凍。之後，我就去攞嘢食，再用匙羹將嘢食放入你個口度。响同你相處嘅呢段時間裏面，我地又好似變番我細個嘅時候，你會餵我食嘢嘅日子。原來，我地曾經真係好close…..
Photo by Salman Hossain Saif on Unsplash
