網主分享

菲比斯的8面金牌! 🏅🏅🏅🏅🏅🏅🏅🏅

Hebi

2022年09月06日

查看 76

A+

上回講到網主希望栗頭可以一睹奥運聖火傳遞嘅歷史性一刻，於是排除萬難帶栗頭到現場觀賞。快樂過後，栗頭又再次不能外出......

2008年08月29日

栗頭老師:

北京奥運已經完滿結束。今年中國攞咗好多面金牌，仲有以前未試過攞獎牌嘅項目都有進帳。開幕同閉幕禮，都令人嘆為觀止。

呢幾個月，touch wood，你叫做無乜大事發生。但係轉過頭，你又因為肺炎再次入院。

我就响中午嘅時候，同阿媽、家姐嚟咗探你，睇吓你個情況點樣。算係好彩啦，醫生話你今次無乜大礙，但係個肺就開始越嚟越弱，佢話會盡量開啲藥去幫你好番啲。希望真係可以啦！

同阿媽佢地响你探病嘅時間裏面，盡量同你傾多啲偈，幫你按摩手腳，仲有抹身。(見到家姐都有落手落腳咁幫你按摩，先知道就算之前我地嘅關係有幾疏離，到咗非常時期，我地一定都會好care！) 轉眼間，探病時間好快就過，我同阿媽佢地之後去食咗啲嘢，食完就返咗屋企休息。

到咗差唔多4點幾嘅時候，我就開始坐立不安、內心掙扎，因為黄昏嘅探病時間差唔多又到，我响度諗緊，如果我而家响屋企無乜嘢做而唔去再睇你嘅話，我會覺得好內疚。但係，如果我自己成日咁樣頻頻撲撲嘅話，我又驚我自己遲早捱唔住。掙扎咗一陣，我始終都係受唔住良心嘅責備，我都係再坐車嚟探你。

你再見到我嘅時候，你好似都幾開心。我再餵吓你食嘢，又同你傾偈。我同你講，今屆奥運，有個人好勁，佢游水攞咗8面金牌，破咗以前「水怪」史畢茲嘅紀錄，佢個名叫菲比斯，係位美國游泳選手。講完比你聽之後，我就嘗試同你做comprehension。

👦🏻: 栗頭，攞8面金牌嘅係邊個呀？

🌰: …………..

👦🏻: 菲……

🌰: …………..

你依然都好似無乜反應咁。好！我再比多啲貼士你。

👦🏻: 菲比…..

🌰: 斯

好嘢！🎉 原來你真係有聽我講嘢㗎！終於，我地叫做互動吓咁啦！我地傾吓講吓，已經又過咗探病時間。栗頭，你保重呀！我會再嚟探你呀。