耆妙
分享
分享
網主分享
聖火傳遞
|
2022年08月26日
|
A+
2008年05月03日
栗頭老師:
自從家姐同啲姨甥仔女離開咗香港之後，我地又回復番之前嘅routine，一個星期會一齊嚟睇你同你玩，同你講兩句 (多都無，因為你都唔係好睬我地！) 。又或者响其他嘅日子，我就盡量抽時間過嚟，睇吓你需要有乜嘢打點。
今年8月，會有四年一度嘅奥運會，而今次係會响北京舉行，香港就會幫手舉辦一啲項目，同埋聖火會响香港傳遞。一生人裏面，可能都未必有一次機會會親眼見到聖火。於是，我諗諗吓，就好想帶你出去，感受吓奥運嘅氣氛。
今日，係聖火傳遞嘅日子。我一早同外傭，將你帶到可以見到聖火嘅一個地方，之後，我就要到附近辦一辦公事，再返嚟會合你地。 過咗一陣，到我返嚟嘅時候，你地已經比人羣重重包圍。我見到有一個報章記者想走埋嚟同你做訪問，佢好好奇，點解坐住輪椅都會嚟睇奥運聖火？我幫你代答，然後就好快打發咗佢走。
越近聖火經過嘅時間，人羣就開始越嚟越多。有啲人覺得你張輪椅阻住佢地行前啲，有啲人就用你張輪椅借力，希望可以將自己撑高啲，睇得清楚啲。响呢一刻，我深深感受到人性嘅陰暗面，大家都係想嚟感受吓氣氛咋嘛，唔駛咁吓話？話哂有個老人家响度，你地可唔可以有啲愛心呢？ 响呢個咁擠擁嘅環境底下，我地唯有默默等待。
終於，見到載住傳遞聖火嘅各界人仕嘅旅遊巴經過啦，其中有一位响經過嘅時候望住你，見到你响度揮動緊支pong pong，個樣好似好奇怪咁。佢究竟係奇怪你坐响輪椅都會肯嚟？還是佢覺得好奇怪，咁多人，我咁樣都帶你嚟，等你咁辛苦？
Sorry 呀！栗頭，其實你都無話過究竟你想唔想睇，我只係一廂情願咁叫你出嚟。 嗰位人仕嘅奇怪目光，實在令我非常深刻。究竟我係啱定錯呢？如果你可以話比我聽就好啦。不過，係啱係錯，我都係出於一番好意，你應該明白㗎呵？
