分享
無奈又殘忍的決定！😔
2007年07月22日
栗頭老師:
似乎我嘅堅持，終於要受到考驗。
Photo by Florian Schmetz on Unsplash
經過同家姐商量之後，大家都覺得，你同阿媽咁樣長此落去，都唔係辦法。只會令我地全家有機會上A1頭條！為咗你有適當嘅照顧，而阿媽可以揾番佢嘅空間，我地唯有作出一個好無奈而又殘忍嘅決定…試吓比你去護老院度住，睇吓大家會唔會好啲。
決定咗之後，我地又要面對另外一個難題，咁究竟我地可以帶你去邊間？
首先，我同家姐都希望你近番我地呢邊，所以我地就由附近嘅一帶開始揾。於是，我地去咗附近嘅某啲院舍視察，發現有啲環境，你入到去都已經快啲想走，更加唔駛講比你入去住啦！另外有啲院舍，響問佢地啲工作人員相關問題嘅時候，就發現佢地未必可以勝任照顧你。有時，感覺嘅嘢，真係好難講，係睇唔啱就係睇唔啱。但係，阿媽個精神狀態又就快爆煲，我地要刻不容緩咁幫你揾個地方，所以無乜時間比我地揀嚟揀去㗎啦！
揾完一輪，當我地心灰意冷之際，咁啱經過一間小本經營嘅護老院。都好啦，横掂都係，咪入去睇埋囉！
入到去，起碼叫做光猛，唔係陰陰沈沈。仲有，每位住客嘅密度唔係太高，有自己自成一角嘅空間。仲要，空氣尚算流通。再加上，負責人同我地講，希望盡量對長者做到有家嘅感覺。一聽完呢句「有家嘅感覺」之後，唔知點解，我同家姐都覺得可以試吓呢間。(之後發現原來感覺都有機會錯 🥺……) 決定咗去邊間院舍之後，我地就要諗點同你講，等你唔好誤會我地係想抌低你。
栗頭老師，可以揀嘅話，我又點會想送你入去？我都好想我地一家人可以齊齊整整咁生活。原來，呢個諗法，人越大，就會越難如願。以前，我地就係好理所當然咁一齊住，從來無諗過，原來呢個諗法可以咁奢侈！
之後，我地照實講，因為阿媽同外傭睇你唔掂，希望試吓揾其他人幫手照顧你，睇吓work唔work。你無出聲，之後我地幫你執咗小小嘢，然後就踏的士過去…🥺🥺🥺
