分享
沒有距離的沈默
2008年03月15日
栗頭老師:
另外一位响外地嘅家姐，今年，終於決定返香港一趟。佢已經有好多年無返過香港，佢今次返嚟，就係希望見吓你，因為佢明白到你可以搭飛機返去嘅機會比較少….難得佢今次返嚟，我地終於可以一家人响同一笪地方出現。過去咁多年，唔係二家姐响香港，就係我無揀到返去嗰邊屋企，寧願同朋友飛去第二度玩。好耐都無試過一齊飲茶、食飯、去玩，更加唔好講有無傾偈。
今次返香港，家姐主要嘅目的係探你，但係，始終佢無返嚟咁耐，仲有佢帶埋兩個姨甥仔女返嚟，所以我地都有安排唔同嘅節目比佢地。例如去迪士尼、澳門、山頂、淺水灣等等，所有遊客做嘅嘢，佢地大概都有做㗎啦！你放心，我地唔會悶親佢地嘅。家姐知道可以對住你嘅時間唔多，佢就盡量响去玩之前嚟揾你，同你傾吓偈、玩認麻雀遊戲，同埋一齊帶你去按摩。响呢一段相聚嘅時間裏面，我地都好開心，當然亦會夾雜住一啲担心。
今日，我地又再去另一個遊客必到嘅景點，就係海洋公園啦！之前去其他地方，你都無份參予。今日，我下定決心，要帶你一齊去！對上一次，你同我去海洋公園，我諗都已經係我小學嘅時候，你話幾嚴重呢？
响我地去嘅過程之中，因為你行動唔係咁方便，我地要將你抱起，然後抱入架的士裏面。好彩有個院舍嘅姑娘肯幫手，同埋佢都幾大力，再加埋外傭同我，所以先可以順利帶你坐的士。
好啦好啦，終於到啦。我地落車嘅時候，要再次經歷投先嘅艱辛，尤其是仲要少埋嗰個大力嘅姑娘，真係幾攞命！但係，只要我一諗到，同你嚟完今次之後，下次會係幾時呢？你仲會响度同我去嘛？我真係唔夠胆再諗落去！唔好諗啦，快啲去玩啦！
我地到處睇吓，之後就準備坐纜車去另外一面繼續參觀。啲工作人員見到我地嘅時候，就叫我地去另一邊排隊，等你可以快啲。到我地上纜車嘅時候，我地要將你抱上去坐，都攪到幾雞手鴨腳，一嚟驚整親你，二嚟又驚阻住後面，不過，我地最終都叫做攪掂。坐响度欣賞風景嘅時候，我就問你，栗頭，啲風景係咪好靚呢？(其實，都無問過你係咪好辛苦？)
你又剩係答: 唔。我心諗，吓，我克服重重困難咁，就係希望你會開心啲，俾俾面，比多啲反應嚟好喎！好得意，你好似收到我諗乜咁，你竟然笑咗一笑，嘩！你好耐無對住我地笑啦，好啦好啦，今日出嚟經歷過嘅艱辛都係值得嘅！
我地再响另外一邊行咗個圈之後，我地驚你出咗嚟咁耐會攰，所以就話不如早啲帶你走，等你休息。為咗家姐同姨甥佢地唔好咁掃興，我就話同個外傭帶你返去先，等佢地可以留多一陣。
我同你再坐纜車返番去另外一邊走，今次我地終於無咁辛苦，因為啲海洋公園嘅員工終於有話比我地聽，原來有啲纜車係專比啲輪椅上，個老人家可以唔駛上落輪椅咁辛苦。嘩，真係多謝哂！你地又唔早講？等我地之前費盡九牛二虎之力抱你上架纜車度，攪到你又辛苦時，我地又辛苦。
算啦，遲講好過唔講。我同你上咗架特別車之後，因為只可以有一個人陪同，我同你就只係兩個人好寧靜咁欣賞沿途風景，我默默咁感受緊我地之間嘅親近。原來，有時，說話真係唔需要太多…..
